تعريف نور الدّين الفلاح الشهير بالظلمي

تعريف نور الدّين الفلاح الشهير بالظلمي

الشهير بالظلمي مارادونا، (53 عام)، ولد الرباط و بالضبط دوّار الدّوم، و عاش فحيّ أبي رقراق، كانو كيعيّطو لو قبل ما يتشهر ب ولد العربية نسبة للسيدة الوالدة ديالو سميتها العربية.

هاجر لإيطاليا فنهاية الثمانينات، و عاش مدّة طويلة فمدينة بادوفا عندو الجنسية الإيطالية و عندو مطعم كبير تمّا، إلى دخلتي ليه فحال إلى دخلتي لمتحف ديال الصور الفوتوغرافية، مصوّر مع گاع اللعابة ديال الدنيا و الدين، الأحياء منهم و الأموات.

نور الدّين مشجع ديال F.A.R من زمان، قبل ما يوّلي المشجّع رقم واحد فالعالام ديال المونتخاب الوطني، مشا معاه لمكسيكو 86 و هو اللّي عطا ديك الراية الشهيرة للزّاكي فاش بقا كيدور بيها فالتيران من بعد التأهل للدور الثاني.

فالسنوات الأخيرة، نور الدّين نقدرو نقولو عليه بأنه تحوّل من المشّجع الأول للقوّاس الأول فالمغريب، فين ما تصوّر مع شي حدّ كيجيب مسكين الربّحة، تصوّر مع بدر هاري تهرّس، تصوّر مع سعد لمجرّد تشدّ، تصور مع إيرڤي رونارد خسر المونتخاب الماتش الأول

نور الدّين قاري، و كان كيدير المسرح واحد الوقت، الأصدقاء المقرّبين ليه كيعرفوه بشخصية سندباد اللي أدّاها فإحدى المسرحيات و تشهر بيها.

نور الدّين كيقول بأنه كيسافر مع المنتخب بمالو الخاص، لكن بعض المصادر اللي سوّلتها كتقول بأنه مستافد من گريمة من يامات الحسن الثاني، و مقرّب من العائلة الملكية .

08:08